السلام عليكم ورحمة الله وبركاته
زي ما حضراتكم قرأتم كده، الجملة دي قالها الطبيب المسئول في مستشفى معينة للزميل في بنك الدم لما بلغهم ان الكيس لسه بيتعمله التوافق.
ونفس الكلام طبعاً اتكرر من أكتر من حد، منهم مثلاً شخص شغال في بنك دم معين لزميل ليه في بنك دم تاني وقاله: "انتوا الصرف عندكم بيتأخر ليه؟ مش هو في التوافق على الشريحة أو البلاطة نقطة من العينة على نقطة من الكيس وتشوف فيه تجلط ولا لأ؟"
في طبعاً من حضراتكم سمع الكلام ده قبل كده، وفي ناس تانية الكلام ده بالنسبة ليها خيال وممكن يقول هو ده ممكن يحصل على كوكب الأرض!!
للأسف، بيتقال وبيحصل ومن أمثلة ده:
- حد يفصل عينة المريض وياخد نقطة من البلازما في أنبوبة ومعاها نقطة من الكيس ويرج الأنبوبة ويبص عليها أو على شريحة أو بلاطة.
- حد يفصل عينة المريض وياخد نقطة من البلازما في أنبوبة ومعاها نقطة من الكيس في ال centrifuge ويدورها ويبص عليها.
- حد ياخد نقطة من عينة المريض (بدون ما يفصلها) ومعاها نقطة من الكيس في أنبوبة أو على شريحة أو بلاطة.
وكل ده للأسف الشديد بيحصل، وبيكون الشخص كده فاكر نفسه بيعمل شغله صح وبيعمل توافق للحالة اللي بيصرفلها. وطبعاً طبعاً ده بيضحك على نفسه عشان يكون قدام نفسه بدل ما يصرف للحالة بدون توافق، فيضحك على نفسه ويوهمها ويوهم غيره بإنه عمل التوافق، مش في دماغه اللي ممكن يحصل للمريض اللي هينقل الوحدة دي.
عشان نجاوب على السؤال ده وعشان نشوف المشكلة كبيرة قد إيه، نقول كده جزئية بخصوص ال agglutination وده ال reaction اللي بيظهر لينا وساعتها نقول حصل reaction وإنه pos ولو مظهرش لينا حاجة بنقول مفيش تفاعل ونقول neg. وال agglutination عشان يحصل زي ما حضراتكم شايفين بيمر بمرحلتين:
- الـ sensitization: وده اللي فيها ال antibody أو بروتين معين بيرتبط بال antigen على الكرات.
- الـ lattice formation: وده زي الشبكة كده، وال antibody مثلاً بيرتبط بـ antigen على cell و antigen على cell تانية وهكذا فيحصل ال agglutination اللي احنا بنشوفه.
في بعض الأحيان بقى بيحصل المرحلة الأولى (الـ sensitization) والـ antibodies اللي ارتبطت بالكرات (لأسباب مختلفة) متقدرش إنها ترتبط بالـ antigens اللي على الـ cells التانية، وبالتالي كل cell مرتبط بيها antibody ونقف لحد هنا ومانروحش للمرحلة التانية ومش هيبان لينا أي agglutination، وهنقول ساعتها مفيش reaction وهنقول neg، والحقيقة إنها كده false neg.
وعشان الجزئية دي ظهر لينا reagent بنستخدمه اللي هو الـ AHG، وزي ما حضراتكم شايفين في الصورة بيرتبط بالـ antibodies اللي مرتبطة بالـ cells ويربطهم ببعض وتحصل المرحلة التانية ويحصل الـ agglutination ونشوف الـ reaction.
وعشان كده لما نيجي نعمل التوافق بعد ما نحضن في 37 لفترة معينة (وده عشان تحصل المرحلة الأولى من التفاعل ولو فيه antibody موجود في بلازما المريض يرتبط بالـ antigen اللي ضده على كرات المتبرع) وبعد كده بنستخدم الـ AHG عشان لو فعلياً في antibodies أو بروتينات مرتبطة بالكرات يحصل الـ agglutination.
أكيد لأ:
- الـ antibody أصلاً مش هيلحق إنه يرتبط بالـ antigen على الكرات.
- لو افترضنا جدلاً إنه في حالة معينة الـ antibody لحق وارتبط بالـ antigen على الكرات واحنا ما استخدمناش الـ AHG، برضو مش هيبان لينا التفاعل.
ولو افترضنا إن فيه تفاعل ظهر، هل التفاعل اللي ظهر نتيجة الـ antibody(ies) اللي ممكن فعلياً تسبب مشكلة ونخاف منها في جسم المريض؟
لأ طبعاً، ومعنى الكلام إن الـ antibodies اللي بتكون ضد الـ antigens على كرات الدم فيها منها:
- بيتفاعل كويس جداً في درجة حرارة الغرفة وأقل من كده، وده مش هنخاف منها لأنها غالباً مش هيحصل منها ضرر جوه الجسم.
- بيتفاعل في درجة حرارة 37، وطبعاً ده اللي الخوف منها عشان هي درجة حرارة الجسم، وبالتالي لو موجودة في جسم المريض ودخل الـ antigen من بره على كرات المتبرع، الـ antibody هيرتبط بيها ويحصل التفاعل جوه جسم المريض.
وعشان كده طبعاً طبعاً يهمنا إن احنا ندور على الـ antibodies اللي بتتفاعل في 37، وعشان كده لازم نحضن لفترة في 37 وبعد كده نستخدم الـ AHG زي ما قلنا. يبقى حضرتك لما تعمل اللي بتعمله وبتسميه توافق:
- هيطلع معاك neg عشان لو موجود مفيش تفاعل هيلحق يحصل، وطبعاً هو كده مش neg هو false neg.
- لو طلع معاك pos (وده طبعاً قليل جداً جداً للي عارف الطريقة دي) ده هيكون بسبب الـ antibodies اللي بتتفاعل في الـ cold.
عرفت بقى حضرتك إيه المصيبة اللي بتعملها؟!
فرق بين التفاعل يطلع معاك neg وإن أنت تعمل أي حاجة عشان يبان ليك neg.
وعارف اللي بتعمله ده ممكن يعمل إيه؟
المريض اللي في جسمه anti-K والكيس اللي هيتنقل برضو عليه الـ K antigen، تخيل بقى التكسير الـ hemolytic reaction اللي ممكن يحصل للحالة:
- والـ reaction ده ممكن يخلي الـ Hb ينزل.
- الـ free Hb يزيد في البلازما.
- يزيد الـ bilirubin وغيرها من المشاكل اللي ممكن تحصل للحالة من تكسير زي ده وده غالباً لأغلب الحالات.
- إنما reaction زي ده لو حصل لبعض حالات معينة بسبب حالتهم الصحية ده ممكن يوصلهم لمشاكل كبيرة للقلب/للكلى/للكبد وممكن توصل للوفاة.
مثال تاني خطر جداً: تخيل حالة زي دي، حالة female وعندها في الجسم anti-K وكان تركيزه في الجسم قليل، حصل لها حمل احتاجت نقل دم ونقلت بعد الطريقة اللي انت عملتها دي (بدون توافق) كيس عليه الـ K antigen. اللي هيحصل إن الـ anti-K في الجسم يعلى جداً جداً، وافترضنا الجنين الكرات بتاعته عليها K antigen والـ anti-K يعدي من الأم للجنين، إيه اللي ممكن يحصل للجنين ده:
- يقل تكون الكرات عنده ويحصله أنيميا وممكن يتوفى.
- تراكم للسوائل في الأعضاء وده ممكن يؤدي لفشل الأعضاء دي.
- وغيرهم طبعاً من المشاكل سواء وهو لسه جنين أو لو اتولد حي بالمشكلات دي.
شوفت بقى الموضوع خطر قد إيه؟
📘 New to Blood Bank?
Start your 5-day journey with Immunohematology Made Easy — a simple, beginner-friendly guide with real-life examples!
👉 Get Your Copy Now